انا : هو انا هحبها ولا ايه؟!
نفسي : تحب مين ياعم ...اهدي كده وصلي علي النبي
انا : عليه الصلاه والسلام ...امال اللي انا فيه ده اسمه ايه؟
نفسي : ممممم مش عارف ...بس معتقدش انه حب
انا : امال يبقي اسمه ايه يا فتك؟
نفسي : ممممم معرفش برضه
انا : طب هو الواحد يعرف انه بيحب ازاي؟؟
نفسي: ديه بقي معرفهاش
انا : انت مالك غبي كده ليه النهارده؟
نفسي : اللي يكرم اصلك
انا : لا بجد فكر معايا ازاي اعرف اذا كنت بحب ولا لأ؟
نفسي : ممم ممكن نسال حد عنده خبره في المواضيع ديه
انا : خبره اكتر مني؟ انت نسيت اني انا اللي بحل كل مشاكل اصحابي العاطفيه !
نفسي : يا فرحتي وتيجي عندنا هنا وتبقي حمار كبير... ياعم اسال حد من العيال الجامده اللي ليهم في المسائل ديه
انا : ما انا سالت!
نفسي : وبعدسن يا مستفز!
انا : اصل الاجابه كانت اصلا مستفزه...بسأله ازي هتعرف اللي بتحبها قالي "لما توحشني وهي جنبي"...شفت هبل اكتر من كده؟!
نفسي : بصراحه.......اه
انا : اصلا هو لو بيفهم هيعرف انه مش فاهم اي حاجه ولا ده اسمه حب لانها لو وحشته وهي جنبه
اولا مش هتبقي كافيه ليه لانه مش حاسس انها عملاله ستسفكشن وكمان لو افترضنا بقي انه رومانسي وكلام الهجس بتاع الاغاني وانها من كتر ما وحشاه بقيت كمان وحشاه وهي جنبه تبقي نزوه مش اكتر مفيش استقرار كده و تركيز
نفسي : يا جامد يا بتاع الاستقرار انت!
انا : اصلا كل كلام الاغاني مبتذل موت ومش صح ومش بيعبر عن اي حاجه
وحرام كمان!
نفسي : في ديه معاك حق....بس مش كل الاغاني برضه!
انا : هو اه في حاجات كويسه ومعانيها ساميه ورقيقه ...بس برضه مينفعش الكلام ده يبقي علي الملأ ...دي حاجات بين الراجل ومراته !
نفسي : صح
انا : طب اعرف ازاي بقي؟
نفسي : هو انت اصلا كنت بتسال صحبك ده ليه؟
انا : اصلي كنت فكرت في حاجه المفروض تبقي موجوده في اللي بحبها... فقلت اخد رأيه فيها بس فقعني بأجبته فمقلتلوش!
نفسي : وايه الحاجه ديه بقي ؟
انا : كنت بفكر اني اللي هحبها ديه هي الانسانه الوحيده اللي ممكن اعترف قدمها باخطائي واي حاجه غلط عملتها ومكسوف منها ومكونش خجلان من نفسي!
نفسي : .....................................................................................
انا : ايه؟
نفسي : مش عارف ...مش حاسسها او مش هي ديه...ديه حاجه ممكن اه وممكن لأ
انا : امال ايه؟
نفسي : فاكر الاختبار اللي عملناه زمان؟!
انا : انهي؟
نفسي : بتاع النوم!!
انا : اه ....اللي هو اني انام في السرير وافكر فيها وابص للسقف وافضل افكر وابص لحد الصبح عشان مش عرفت انام من التفكير؟
نفسي : ايوه عليك نور هو ده ايه رأيك؟
انا : بس اصل انت عارف اني بنام علي طول ومش في حاجه تقدر تخليني صاحي وكمان وانا راقد في السرير لحد الصبح!
نفسي : امال ايه بقي انتي خنفتني و كمان احترم نفسك بقي واتلم ده كلها يومين ورمضان يهل!!
انا : احترم نفسي ايه ياحمار ؟!! هو انا بقولك هخدها واروح سينما ولا نمسك ايدين بعض ونتصرمح عالكورنيش؟!!!!! انا بكلمك في احساس يا متخلف احساااااااااااااااااااااااااي في احساس حرام او غلط؟ هو ربنا قال متحبوش في رمضان ؟!! ايه ده ؟
نفسي : ايه يا عم براحه شويه انا مكنش قصدي
انا : استغفر الله العظيم
نفسي : طب ممكن اسالك سؤال؟
انا : اطربني !
نفسي : هو انت مشكلتك ازاي تعرف اذا كنت بتحب ولا لأ؟
انا : ايه ده ؟عرفتها لوحدك ؟ برافووو
نفسي : من غير تريقه لو سمحت...انتي لو فعلا بتدور علي الحب او تتأكد من وجوده يبقي انت ناقصك خطوه مهمه جدا!
انا : الا وهي؟
نفسي : انك تعرفه!
انا : يعني ايه مش فاهم؟
نفسي : يعني عشان الواحد يلاقي حاجه لازم يكون عارفها اصلا .. انت راجل بتاع كميا وعارف انك عشان تكشف عن وجود ماده لازم تكون عارف تركيبها الاول!
انا : كمل..
نفسي : يعني اذا كنت عايز تعرف اذا كنت بتحب ولا لأ يبقي لازم تعرف الاول ايه هو ده اللي انت بتدور عليه....ايه هو الحب؟!!
انا : ايه السؤال ده ....الحب هو.....هو.......هو الحب!
نفسي : عرفت الماء بعد جهد بالماء! يا ابني انت عارف اننا في زمن اغبر المعاصي والشهوات بقيت هي الاساس والحق النور بقوا حاجه استسنائيه والفتن دلوقتي بقيت في السوبر ماركت! والصح اتخلط بالغلط ومحدش بقي عارف حاجه ... عشان تعرف تلاقي اللي انت بتدور عليه وتعمله صح يعني تعمل الصح صح لازم تبقي عارف كويس ايه هو الصح ده كويس اوي عشان تعرف توصله...فهمت حاجه؟
انا : تصدق طلعت بتفهم !
نفسي : الله يخليك ...دلوقتي بقي لازم تعرف ايه هو الحب اللي انت عايز تكشف عن وجوده ...عشان انواع الحب في الزمن ديه كتير والكبائر والمعاصي اللي بترتكب باسم ااحب بقيت اكتر ..من اول حب الكليبات والاغاني لحد حب العرفي !
انا : اعوذ بالله ....احنا مالنا بالحاجات ديه ...انا بتكلم عن الحب ..الحب اللي اساسه اني احب الله واحب عباده فيه...ومش معني اني احب واحده يبقي غلط...اني هدفي من الحب ده هو انها تكون مراتي ونص ديني زي ما ربنا امر
انها تبقي نص ديني وربنا يعنني واتقيه في النص التاني ... و كمان انت عارف ان ايا كانت نتيجه تفكيري ده يعني سواء طلعت بحبها او لا ده لن يغير من طريقه معاملتي ليها او علاقتنا ..كل اللي هيتغير هو طريقه تفكيري واستعدادي ..يعني هحطها كهدف وحلم قدامي وااموت نفسي واعمل كل حاجه عشان اوصل لحلمي
نفسي : جميل بس برده معرفناش ايه هو الحب اللي بندور عليه!
انا : ممممم بص هو انا لما بتخيل كده بشوف ان الحب ارتياح لشخص وثق به عقلك وسلم له قلبك ... يعني عارف لما تبقي مخنوق موووت وممكن تكون مش عارف حتي ليه وماشي في الشارع ونفسك تكلم اي حد بس كل ما يجي في بالك حد تستبعده
لحد ما توصل لشخص ما تقرر ان هو ده اللي انت عايز تكلمه و تبقي اخر دقيقه في موبيلك وتكلمه وممكن متقلوش حاجه خالص بس تسمعه او تستمتع بكونك معاه حتي لو كان علي التليفون وحتي لو كانت لحظه
او عارف ممكن تكون جامد بقي وبدل ما تكلمه تقوم نبعتله بأخر رصيد معاك رساله فاضيه
نفسي أتمرجح
قبل 11 عامًا
14 توته توته خلصت الحدوته...حلوه ولا ملتوته؟!!:
و الله يا مصطفى الواحد ماعارف يوقل ايه ؟؟؟؟لانك بمنتهى البساطة اتكلمت عن الموضوع بواقعية جدا .... فى ناس كتير بتفكر فى ناس تانية و تقول انها بتحبها على الرغم من انها ماتعرفش اصلا ايه هو معنى الحب !!!و على فكرة مادام سألت نفسك السؤال ده يبقى انت كدة ماشى على الطريق الصح ... لانك لو كنت اتسرعت من الاول و قلت انا بحب الانسانة دى و علقت نفسك بيها ممكن تكون كدة ارتكبت اكبر غلطة فى حق نفسك ... انما انت فكرت صح ... مجرد سؤالك لنفسك ايه هو معنى الحب ؟؟ (حتى ان ما كنتش فى الاخر لقيت له اجابة ) هو ده كدة عين العقل... و انت حتى بتعريفك للحب اللى نفسك لم تتقبله يعتبر تعريف سليم .. لان من الاخر الحب مش زى ما صاحبك قالك (انك تحس انها وحشاك و هى قصاد عينك) مع احترامى ليه ده تخاريف ...انما اللى انت قلته ده يعتبر معنى من معانى الحب و هو الارتياح لمجرد وجودك معاها أو حتى الشعور بالارتياح لما تحس للحظة انها فاكراك ... على العموم انا عاوزة اقولك رأيى فى حكاية معنى الحب ده (مع انى مش كبيرة كفاية علشان اديك نصيحتى و لا عندى خبرات فى المسائل العاطفية بس كل ما فى الموضوع ان عندى وجهة نظر فى حوار الحب ده يمكن تفيدك)
بص يا سيدى ... الحب فى مجمله انا بعتبره رد فعل مش فعل ... يعنى الواحد بيحب لما يحس ان الشخص اللى قدامه بيحبه أو حتى بيبادله نفس الشعور ... و المرحلة اللى انت فيها دى لا تعد حب .. بل هى مجرد اعجاب و بس لانك لسة ما قربتش من الانسانة دى بالقدر الكافى (لانك لو كنت قربت كنت عرفت تحدد مشاعرك و مشاعرها)
امال سيادتك بقى تعمل ايه؟؟؟
تسيب نفسك فترة تحاول فيها تحس بمشاعرها هى من ناحيتك .. فان كانت بتبادلك نفس الشعور (و بيبان على فكرة) يااما لأ
و بكدة تكون بتحمى نفسك من خطأ الحب من طرف واحد اللى ممكن يوجعك بشدة و يجرحك .... و كدة يبقى نص الطريق عدى
أكيد دلوفتى بتسأل نفسك سؤال (طب أنا دلوقتى عاوز أعرف ان كنت أنا اللى بحبها و لالأ؟)
حاضر ... انا هقولك على طريقة (بس برضه مش متأكدة لكن جربها و السلام و ابقى قولى )
ابعد فترة عنها ماتحاولش فيها لا تشوفها و لا تكلمها خاااالص و لاحتى تحاول تحسس نفسك انك عامل كدة بتعمد و عيش حياتك عادى خالص .. لو لقيت نفسك غصب عنك بتفكر فيها و مش قادرة صورتها تتمحى من خيالك...أو حتى بتفكر فى موقف حصل لك معاها قبل كدة ...و مش عارف فعلا تعمل حاجة و انت بعيد عنها يبقى انت كدة بتحبها .....
انت بتحب بنت الجيران ولا ايه؟ اشمعنى الشباك يعنى اللى يخليك تحيرنا جنبك كدا
ع العموم انا عن رايى يمكن يساعدك فى الحيرة دى طالما انك بتحب تاخد راى اللى حواليك ان الحب مش بقتنع انه ييجى مرة واحدة يعنى انت طالما سالت نفسك انا هاحبها ولا ايه معنى كدا ان البنت فعلا فى قلبك حاجة ليها يمكن لسة ماترسختش بس موجودة والا اشمعنى هى دوناعن كل البنات اللى حواليك اللى خالتك تحتار كدا ؟ فى حاجة تانية كمان انت الوحيد اللى لازم تثبت لنفسك انت بتحبها ولا لا يعنى ادى لنفسك فرصة فى انك تقرب منها شوية من غير ماتبينلها اوى انك مهتم بيها عشان لو لاقيت نفسك مانسجمتش معاها يبقى ماعلقتهاش بيك وخلاص ومش قصدى من كدا حاجة غلط ولازم تكون عارف ان معظم البنات بيحبوا اللى بيحبهم الاول بمعنى اننا مش هانحب حد الا لو كان باينلنا انه بيحبنا مش هانمشى نحب على نفسنا عشان كدا بقولك توخى الحذر اوى وانت بتحاول تفهمها اكتر لان البنت بتتعب اوى لما حبها يضيع انت ممكن تتخاطاه على اساس انك كنت بتحاول تشوف نفسك بتحبها ولا لا بس هى مش هاتفهم كدا كمان مش هاينفع تفضل فى الحيرة دى كتير عشان زى ماقلت لازم تاخد موقف ولو الاقيت يامصطفى ان فى تفاهم بينك وبينها وبتستريحلها وحسيت منها انها ان الشعور متبادل ساعتها بس قولها انك بتستريحلها ومهتم بيها مش بتحبها ولو هى بتبادلك نفس الشعور مش هاترفض كلامك وهاتفهمه وممكن اوى بعد كدا تبتدى تاخد العلاقة منحنى جد شوية بس تكون انت وقفت على ارض صلبة وتتخطبوا بس مهم انك تكون مفهمها دا مش ماتقولهاش عشان زى ماقلتلك لو هى حست ان الموضوع طول هاتقول دى كانت نزوة بس كدا دا اللى عايزة اقولهولك اه وياريت تفهم ان مش دايما اللى عنده خبرة هو اللى لازم تاخد رايه بالعكس انا شايفه مش حو اوى لانه خاض علاقات كتير وماكنتش ناجحة ولا جاب الخبرة منين فصعب يفهم الاحساس الصادق لانه لسة ماحسهوش ولما تعوز تعد مع نفسك ابعد عن البيت عشان توصل لحاجةاه مش غريبة اوى انك مش فاهم اذا منت بتحبها ولا لا مع انك احلى واحد شفته بيتكلم عن المشاعر؟ ولا باب النجار مخلعكمان زى ماقالت المشاعر مش شى وحش ابدا وانت شخص كويس جدا فتاكد ان مشاعرك هاتوديك لاتجاه صح زى ماقلت يرضى ربنا
مع كل احترامى لرايك ياسروق فى كل اللى قلتيه لكن ليا تعقيب صغير ماينفعش ابدا انه يبعد عنها ويشوف هايفكر فيها ولا لا لانه ببساطة لسة بيحاول يفهمها ينفع افهم مادة عليا بانى اركنها واسشوف نفسى هافكر اذاكرها ولا لا؟بيتهيالى لسة بدرى على انه ياخد خطوة زى دى .بس هو دا رايى فى النقطة دى لكن كل اللى قلتيه متفقة معاكى فيه
معلش يامصطفى بس عايزة اقولك نصيحة مهمة اوى ياريت تفكر تعمل بيها لو علاقتك بوالدتك قويةياريت تكون معاك فى الفترة اللى حاية ومش تتكسف تحكيلها على حاجة بس عشان مهم تاخد بنصيحة حد اكبر منك يخاف عليك واكيد ماحدش هايخاف عليك ادها ومش تضك على كلامى عشان كل الولاد بيستهزاوا اوى بالنقطة دى بس اعتقد انك عاقل وهاتفهم اقصد ايه
اممممممممم
ياسلام على الكلام
هو كلام شروق منطقي
بس هقولك رايي انا ف الموضوع
اولا الحب احساس حلو اوي
احساس لازم يكون من الطرفين
احساس بتحس فيه انك مالك الدنيا كلها
انك طاير
بتحس انك عايز تشوف اللي بتحبه ف كل وقت
في كلمة انت قلتها صح اوي
لما بتقول لما تكون متضايق عايز بس تسمع صوته حتى لو مقلتش حاجة بس تكون معاه
انا معاك ف الكلمة دي
لما تكون مستعد تعمل اي حاجة علشان اللي بتحبه
مستعد تحارب الدنيا كلها علشان تكون معاه
تعمل اصعب حاجة واكتر حاجة مكنتش متخيل انك تعملها
وهو طبعا لله المثل الاعلي
بس عارف لما تحس ان ربنا بيحبك اوي ولدرجة اي حاجة تطلبها منه يعملهالك
انت بتكون كده لو بتحب
اعتقد ان ده هو الحب من وجهة نظري
وعلشان تعرف بقى انت بتحب ولالا
راي شروق مش صح اوي انك تبعد
انت لازم تتاكد
فكر شوية مع نفسك
ايه هدفك من الحب ده
يعني اخرتها ايه
اسال نفسك
شوف انت عايز تحب لمجرد الحب
ولاانت جواك هدف اسمى
ولا انت بتحب علشان تكون دي شريكة حياتك
تخيل حياتك معاها
فكر شوية كده
تقدر تعيش معاها حياتك كلها
تقدر تحس بالامان وانت معاها
شايفها جنبك بعد 10 سنين من دلوقتي؟؟؟
لو حسيت بكده يبقى انت بتحب بجد
لو محستش انك تقدر تكمل حياتك وانك ممكن تزهق او تفكر ف غيرها
يبقى انت مش بتحب
ممكن ساعتها يكون اعجاب
او حتى انجذاب وهيروح
او تعود
فكر شوية ومفيش اكتر منك بيفكر وهتعرف اذا كنت بتحب ولالا
بس كده انا خلصت خلاص
مع كل احترامى لرايك ياسروق فى كل اللى قلتيه لكن ليا تعقيب صغير ماينفعش ابدا انه يبعد عنها ويشوف هايفكر فيها ولا لا لانه ببساطة لسة بيحاول يفهمها ينفع افهم مادة عليا بانى اركنها واسشوف نفسى هافكر اذاكرها ولا لا؟بيتهيالى لسة بدرى على انه ياخد خطوة زى دى .بس هو دا رايى فى النقطة دى لكن كل اللى قلتيه متفقة معاكى فيه
انا حاسة يا فندم انك فهمتى اللى قلته غلط انا اللى اقصده انه يبعد لسبب واحد بس ... ان الواحد لما بيبعد عن شخص مش بياثر فى حياته او مش مهم بالنسبة له بيبقى الموضوع عاااادى جدا و بيكمل و الدنيا مش بتقف ...... انما لو الواحد حاسس ناحية انسان معين بشعور و لنقل مجازة انه الحب لما بيبعد عنه مش بيعرف فعلا يعيش ....(انا عارفة انك هتقولى بس هو أصلا مش عارف اذا كان بيحبها و لا لأ؟)
انا بقى ليّا رأى مقتنعة بيه اقتناع تام ان الواحد لما يلاقى نصه التانى (يعنى اللى ربنا كاتبهوله علشان يكون شريك حياته)بيبقى فعلا بينهم حاجة زى التوارد الروحى و الفكرى ... بيبقوا فعلا مش عارفين يعيشوا ن غير بعض..
يعنى لو لقى فى بعده عنها انه عايش حياته عادى و انها ماكنتش بتأثر فى حياته ولا فيه .. يبقى هو من الأخر ش بيحبها
انما لو لقى فى بعده عنها .. اشتياق انه يشوفها أو يسمعها .. يبقى أكيد فيه احساس جواه من ناحياتها و مش هنقول حب هنقول بداية الحب .....
دى وجهة نظرى مش أكتر
السلام عليكم
بداية عاوزة اقول لكل الناس كل سنة وانتو طيبي وبصحة وسلامة ورمضااااان كرييييييييييييييم
اما بعد،،،
بجد يا مصطفى انا مستمتعة جدا وانا بقرأ كلامك ده ,فعلا عاجبنى اسلوبك_ وان كان في كلمات بتبقى شديدة شويه انها تتقري _ بس بجد حلو جدا اسلوب حوار النفس باختصار اسلوبك بيخلي الواحد يتشد انه يعد يكمل لحد الاخر
عاوزة اقول حاجة ان الحب ف اوله ممكن يكون محير خاصة للناس اللي بتحب باخلاص نية بس برده هو مش محتاج انك تسال الناس هو ده الحب ولا لاء؟
ربنا هيدلك من مواقف كتير تمر بيها
هتعرف ساعتها دي نزوة ولا لاء
انا طبعا بتكلم عامة ومش موجهة الكلام لشخص بعينه بس مجرد رد ع الكلام الجميل اللي قريته
ربنا يوفق كل انسان ويهديله قلبه وعقله للخير يارب
رمضااااان كريييييييييم
السلام عليكم
Ramanda
R.M
شوف يا مصطفى الكلام جميل جدا ولو فى فعلا حوار بينك وبين نفسك كده يبقى بجد شئ جميل
أما بالنسبة للحب فأعتقد ان كلام الأغانى ده كلام مبتذل جدا بمعنى الكلمة لأن وبمنتهى البساطة الحب ده احساس صعب انك تعبر عنه بكلام وبعدين هو مش قاعدة ثابتة بيطبقها كل الناس لأ ده احساس بيختلف مش شخص للتانى مش قاعدة عامة يعنى وصعب ان الانسان يلاقيله تعريف محدد الا لما يحس بيه بجد ساعتها أعتقد انه هيكون احساس مختلف عن أى احساس الانسان حس بيه قبل كده لأنه فى رأييى صعب ان الانسان يحس بيه اكتر من مرة لأن القلب ده مش جمعية تعاونية للى يحب يشارك ده حاجة مقفولة كده وبواباته فولاذ مش سهل انها تتفتح ولو اتفتحت مش هتتفتح غير مرة واحدة واحدة وبس لما ربنا سبحانه وتعالى يأذن بده
وأعتقد ان لما ييجى الوقت أكيد الانسان هيحس بان هو ده الحب وممكن تجرب وصفة شروق
اةةةة يا مصطفى
اولا: الاسلوب جامد موووووووووووووت واجمل مافيه صراحتة ووضوحة وواقعيته
ثانيا: انا معجبة موووت بالفكرةوالمعنى وبؤيد رأي رضوى
وعندي اضافة
هو ممكن مايكونش احساسك دة بالفعل حب بس على الاقل انت في بداية الطريق....لائنها باختصار حد مش عادي
فكمل وانشاء الله لو هي الخير ربنا حيشرح قلبك ليها اكثر
اكثر من الاستخارة والحاجة يا مصطفى
أسلوب مالهوش حل مع انه بالنسبة لي كان "فجأة" بحق وحقيقي ,,,
بس فكرة جديدة ...مع إن انت ونفسك محتاجين شوية تفاهم شوية أكتر من كده .. "شوية شوية كنا هنيجي نفض بينكم"
...بس ياريت فعلا تكون مع نفسك كده ...
.................
"بص هو انا لما بتخيل كده بشوف ان الحب ارتياح لشخص وثق به عقلك وسلم له قلبك ... يعني عارف لما تبقي مخنوق موووت وممكن تكون مش عارف حتي ليه وماشي في الشارع ونفسك تكلم اي حد بس كل ما يجي في بالك حد تستبعده
لحد ما توصل لشخص ما تقرر ان هو ده اللي انت عايز تكلمه و تبقي اخر دقيقه في موبيلك وتكلمه وممكن متقلوش حاجه خالص بس تسمعه او تستمتع بكونك معاه حتي لو كان علي التليفون وحتي لو كانت لحظه" ...
بيتهيألي إن الإحساس ده هو أول خطوة فالطريق ...
بس مش معنى كده إن ده هو الحب ..
لأني حاسة إن الحب ده زي ماقالت روز ميتوصفش
وبعدين كلمة بحبك دي كلمة كبييييييرة أوي ... مش أي حد يستاهلها....
لأنها هتكون لشخصية واحدة في حياة كل حد مننا .. يعني مش جمعية تعاونية فعلا ...
لكن إجابة السؤال ده بقى .. فهي عندك إنت وبس ومعتقدش إنه فيه حد على وجه الأرض هيقولك على إجابته إلا نفسك وبسسس
وإللي هيهدي نفسك للصح والخير .. هو ربنا .. فمطبطلش استخارة .. ومش لازم صلاة كل شوية انت ممكن في اليوم تستخير ربنا آآآد كده بدعاء الاستخارة كل شوية .. وبعدين ياسيدي دعوة الصائم مستجابة ..أدعي بقى تثبت على الصح
وربنا معاك في حيرتك ... ومعانا كلنا إحنا كمان.....
السلام عليكم
انا بالعاده ما بعلق على ما اقرا لكن عن جد كلامك شدني اني اعلق المره هادي
مش هتكلم عن الحب لانها بالفعل كلمه ما بتنوصف
و الشباب ما تركوا شئ اقوله فعلا كلامهم منطقي وسليم
لكن ممكن اقول شئ قبل لا تختبر اذا فعلا هادا الحب من القلب ولا مجرد اعجاب فكر بعقلك (بدون قلبك ) هي بتناسبني اولا ولا لأ طباعها من طباعي في شئ مشترك بينا؟؟ في تقارب وجهات نظر ؟؟..اعتقد انه هادي اول خطوه وبعد كده اختبر الحب
طيب كيف تختبر؟؟؟بصراحه ما بعرف ؟؟ لما تعرف انت قولي ..
شئ اخير كنت حابه اقوله
العلاقه كتير متوتره بينك وبين نفسك شتايم و و ...
هدوا شوي .. شويه وهتقوموا تضربوا بعض .. ههههه ..
بهنيك على اسلوبك الرائع .. بالتوفيق
بجد انت دمك خفيف جدا وانا عايزة اقول لك انك بجد عبقرى فى فكرتك الجديدة دى
نهاية بارعة عجيبة:
"مصطفي... مصطفااااااااااااااااااااااااااااااااااااااااااااااااااااااااااااااااه بطل واقفه في الشباك وكلم ماما
والأعجب سرعة استجابتكم!!!:
"انا : ايو انا جاي اهه"
!!!
اشمعني؟!!
إرسال تعليق