CLICK HERE FOR BLOGGER TEMPLATES AND MYSPACE LAYOUTS »

2009/06/15

مذكرات ذنب


السبت..:

يافتاح ياعليم يارزاق ياكريم..صبحانا وصبح الملك لله..اظاهر ان الاسبوع ده هيبقي مليان..والله البني ادمين دول ناس جامده جدا..دول بيبدؤا يجمعوا ذنوب ما قبل مايصحوا من النوم اساسا.!!..مش بقولكوا هيبقي اسبوع مليان شغل..وادي اولها..الاستاذ مصحيش يصلي الفجر..حلو اوي ..ده علي اخر النهار كده هنكون عملنا سكور مش بطال..يامسهل...!!

.. .. .. .. ..

الأحد..:

والله اللي قال ان البني آدمين دول كسلانين ظلمهم!!..دول شايفين شغلهم وشغالين ذنوب الله ينور.. ده كفايه ال3 ساعات اللي قعدهم الشاب الجميل ده قدام ميلودي..وبعدين ساعتين قدام مزيكا..وبعدين ختم السهره عالنت علي.........(حذفت للرقابه)..بسم الله ماشاء الله عليه..ربنا يحفظه..!

!.. .. .. .. .. ..

الاثنين..:

اهو ده بقي اللي يحرق الدم..هو مفيش اسبوع يعدي كده من غير مشاكل ولا منغصات..يعني كان لازم الأنسه ديه تفتكر الاستغفار دلوقتي..قاعده من الصبح بتستغفر لما ضيعتلي شغل الاسبوع كله...استغفر الله العظيم..بس الحمدلله..الانسه صاحبتها الجميله ديه قعدت قعده نميمه حلوه كده مع شلتها..عوضت كل اللي ضاع بسبب صاحبتها اللي استغفرت..ربنا يحميها يارب..!

.. .. .. .. .. ..

الثلاثاء..:

ياجماعه الاسبوع ده تاريخي!!..لسه فنص الاسبوع والسكور وصل رقم قياسي..كل ده ومفيش قتل ولا زنا ولا سرقه ولا حاجه من الكبائر..الناس تستاهل جايزه علي مجهوداتهم.!

.. .. .. .. .. ..

الاربعاء..:

النهارده بقي يوم مختلف..اصلي لقيت زبون جديد انما ايه..اصلي!!..الراجل المحترم اللي بيصلي هناك ده..ايوه ده..عمال بيطول فالصلاه ويحسنها..عشان الناس اللي فالجامع يقولوا علي تقي وورع!...هه..عليا انا..قديمه!..لأ و كمان الباشا راح اتبرع بمبلغ محترم ..طبعا قدام امه لا اله الا الله..عشان يقول انه كذا وكذا وكذا...فعلا ياجماعه..الانسان ده مبيغلبش..وبيعرف يفتح لنفسه سكك جديده مهما كانت الصعاب..!

.. .. .. .. .. .. ..

الخميس..:

احسن حاجه الصحبه..فعلا والله..النهارده انا فعلا استمتعت وانا مع شويه الشباب والبنات دول!..كانت خروجه تجنن..سواء فالسنيما لما.........(حذفت للرقابه)..او لما قعدنا فالكافيه والبنات شربوا شيشه..والولاد عملوا دماغ حشيش انما ايه..ولا لما رحنا الديسكوا بالليل..كانت ليله عجب..دول...........(تعتذر الرقابه عن الاستمرار حيث ان الامر اصبح فوق طاقتها فالحذف...المقصات خلصت!!)..بجد مووووز!

.. .. .. .. .. .. ..

الجمعه..:

ليه كده بس...اهو الاسبوع الجاي اضرب..الراجل المفتري ده...خد ولاده وراحوا قعدوا كلهم قروا سوره الكهف عالصبح كده...ربنا يسامحك!

.. .. .. .. .. .. ..

السبت..:

ياجماعه انا تعبت..ومبقتش قادر استحمل حجم الشغل ده كله لوحدي..انا بفكر اعمل اعلان اطلب موظفين..بس تفتكروا هلاقي حد..اعتقد انا الشياطين قاعده فاضيه ناو بما اننا في رمضان!!..وممكن حد فيهم يوافق يشتغل معايا...دعواتكم....

.. .. .. .. ..

إمضاء...ذنب صغير

.. .. ..

تمت

... . ... . ... . ... . ...

انتظروا الجزء التاني..مذكرات حسنه.

1 توته توته خلصت الحدوته...حلوه ولا ملتوته؟!!:

إلى متى ؟! يقول...

اولا: الفكرة
فكرة ان يكون المتحدث الذنب نفسه فكرة جديدة جدا ومميزة فنفس الوقت
لأنه هو ملوش دعوة باللى بيعملوه البنى آدميين هو جاست ملاحظ لكن مش هو اللى بيوسوسلهم اعملوا كذا وكذا..

ثانيا: الشمول
الشمول فأنواع الذنوب نفسها
مابين ذنوب ترك وذنوب اقتراف
فكانت ذنوب الترك مثلا فترك فريضة الفجر
وذنوب الاقتراف فالنميمة وموضوع ميلودى ده

وما بين ذنوب قلبية غير مرئية وأخرى بالجوارح على عينك يا تاجر

فكانت الذنوب القلبية "فالراجل المحترم اللى بيصلى هناك دة" يعمل بعمل الصالحين لكنه قلبه مرائى يبتغى السمعة عند الناس أخشى عليه قول الحق
"وقدمنا إلى ما عملوا من عمل ٍ فجعلناه هباءا منثورا"

أما الذنوب اللى على عينك يا تاجر
فكانت من شلة الشباب والبنات دول
وربنا يحفظنا من الوقوع فى ذلك أو حتى فاللى أقل منه !!!

هذا ماكان عن الشمول

ثالثا: رؤية الجانب المشرق

فالحوار مجاش بس عن الذنوب وان البنى آدمين دول عالم ضايعة وبس
فالأخ الذنب الضغير برضه له رؤية منصفة

شاف الجانب الايجابى من البنى آدميين اللى بيخلليهم برضو بيعملوا طاعات مش مقضينها ذنوب بس
زى الآنسة اللى استغفرت وإن كانت اتبعتها بالنميمة لكنها برضو فيها خير وبترجع للاستغفار مبتسبش الذنب يحيط بيها
اللهم أجعلنا ممن قلت فيهم:
"وآخرون اعترفوا بذنوبهم خلطوا عملا صالحا وآخر سيئا عسى الله أن يتوب عليهم إن الله غفور رحيم"

ولا تجعلنا يارب ممن قلت فيهم:
"كلا من كسب سيئة وأحاطن به خطيئته فأولئك أصحاب النار هم فيها خالدون"

كذلك ذكر الناس اللى بتعمل طاعة خالصة من غير مايلحقها الشيطان بذنب
زى الراجل وولاده لما قروا سورة الكهف

وكان أيضا فى عرض الجانب الايجابى شمولا ملفتا
فعرضتم الطاعات التعبدية كالقرآن والاستغفار
وكذلك الطاعات فى الاجتماعيات لما الأب دة جمع شمل الأسرة فقاعدة عبادة يوم الجمعة

فكان شمولكم فاائق

رابعا: الأسلوب
توافق حكيم مابين الموضوع والأسلوب
فكان الأسلوب العامى الساخر الطريف ليخفف من حدة الوعظ والنصح فيتحقق الهدف أن تعترف القلوب والعقول بذنوبها و تسعى للتغيير دون شعور بضربة سياط النصح على الجسد المذنب فيأبى إلا عنادا

وأخيرا:
عمل متجدد الفكرة.. عميق التناول فائق الشمول.. تحييه روح التفاؤل..حكيم الأسلوب ..سامى الهدف

ممتد العطاء الشمولى الايجابى فى عالم الخيال
وننتظر اشراق ذاك الامتداد على سن القلم وسطر الورقة فى "مذكرات حسنة"


وبجد بجد " والله البنى آدمين دوول ناس جامدة جدا"

وفى انتظار مزيدا من الجمداااااان